Il-Festa ta’ San Bert f’Ħal Tarxien

Il-bieraħ 24 ta’ Awwissu, kienet iċċelebrata il-festa tal-Martirju ta’ San Bartilmew Appostlu fil-Knisja dedikata lilu u lill-Madonna tal-Bon Kunsill, miżmuma b’għożża kbira mis-Sur Godwin Dalli, Sagristan Maġġur tal-Kon-Katidral ta’ Ġwann u iben il-mibki Sagristan ta’ Ħal Tarxien Ġużeppi.

Il-Knisja ta’ San Bartilmew Appostlu u l-Madonna tal-Bon Kunsill bdiet tinbena fit-30 ta’ April 1764, fuq pjanta ta’ l-arkitett Giuseppe Bonnici, bi flus Dun Bert Mangion li f’mewtu fit-2 ta’ Awwissu 1759, ħalla ġidu biex tinbena din il-Knisja.

Il-Knisja, li tlestiet fl-1776, hi meqjusa bħala ġawhra ta’ l-arkitettura b’xogħol fin ta’ lavur u skultura fil-ġebla Maltija. Fuq talba tal-Kappillan Dun Ġwann Psaila, il-Knisja kienet ikkonsagrata fit-30 ta’ April 1797 mill-Isqof Vincenzo Labini.

Il-kwadru titulari, li juri lil San Bartilmew Appostlu u lill-Madonna tal-Bon Kunsill fil-parti ta’ fuq, hu xogħol ukoll Rokku Buhagiar. Apparti l-artal maġġur nsibu żewġ artali oħra dedikati lil Marija Addollorata u lil San Andrea minn Avvelino.

Dun Bert Mangion jinsab midfun f’nofs il-Knisja wara li nġieb mill-Knisja Parrokkjali fl-14 ta’ Marzu 1776, akkompanjat mill-kleru u l-poplu ta’ Ħal Tarxien, kif hu stess kien ħalla fit-testment.

Il-Knisja hi miżmuma b’għożża kbira u tilqa’ fiha ta’ kuljum lill-Ewkaristija għall-espożizzjoni tas-Santissimu Sagrament.

Illum jibda t-Tridu ta’ San Bert

Illum l-Erbgħa 20 ta’ Awwissu jingħata bidu għat-Tridu bi tħejjija għall-festa ta’ l-Appostlu San Bartilmew, fil-Knisja dedikata lilu u lill-Madonna tal-Bon Kunsill f’Ħal Tarxien.

Fis-6.30 pm tingħad it-talba tar-Rużarju u fis-7 pm tibda Quddiesa bl-omelija għat-tfal tal-Parroċċa. Wara tingħad il-Kurunella lil San Bert u Ċelebrazzjoni Ewkaristika.

Għada l-Ħamis 21 ta’ Awwissu, it-Tieni Jum tat-Tridu, għall-Quddiesa bl-omelija huma mistiedna l-koppji miżżewġin waqt li għall-Quddiesa tat-Tielet Jum tat-Tridu, il-Ġimgħa 22 ta’ Awwissu, huma mistiedna l-Għaqdiet Reliġjużi u Soċjali fir-raħal.

Is-Sibt 23 ta’ Awwissu, Lejliet il-Festa, fid-9.30 am Quddiesa Kantata li fi tmiemha jitkanta t-Te Deum. Mistiedna speċjali huma l-anzjani tal-Parroċċa. Fis-6 pm Qrar minn konfessur barrani u fis-6.45 pm Translazzjoni tar-Relikwa u wara Għasar Solenni u Quddiesa.

Il-Ħadd 24 ta’ Awwissu, Jum il-Festa. Fit-8 am Għasar u wara Quddiesa. Fis-6.30 pm Għasar u fis-7 pm Quddiesa Solenni mmexxijja mill-E.T. Mons Ġużeppi Mercieca, Arċisqof Emeritus ta’ Malta. Jinseġ il-Paniġierku Patri Pawl Galea O.F.M. Wara Antifona, Ċelebrazzjoni Ewkaristika u Bews tar-Relikwa.

Santa Marija f’Ħal Tarxien

Il-Gimgha 15 ta’ Awwissu, il-Knisja Kattolika ċċelebrat is-Solennità tat-Tlugħ fis-Sema tal-Beata Verġni Marija.

F’Ħal Tarxien din il-festa kienet ċelebrata b’għożża kbira fil-Knisja ta’ Santa Marija tar-Rokna li għal sena oħra ntramat għall-okkażjoni tal-festa minn Gużeppi Fabri u ibnu Raymond.

Il-Knisja ta’ Santa Marija tar-Rokna tmur lura għall-1415, mibnija mill-armla ta’ Gentile Azzopardi jisimha Duminka, li għanietha b’xi renti, fi żmien l-Isqof Antonio di Platamone.

Il-forma tal-Knisja, kif nafuha llum b’koppla ottagonali, saret bejn l-1729 u l-1737 waqt li l-faċċata tagħha nbniet mill-ġdid fl-1909 bi flus Dun Franġisk Penza. Dun Franġisk żejjinha b’żewġ kampnari u bejniethom statwa tal-ġebel li turi lil Santa Marija, xogħol Franceso Faure.

Il-Knisja għandha żewġ artali. L-artal maġġur għandu titular mpitter minn Rokku Buhagiar fl-1771 bi prospettiva mill-isbaħ mirquma fil-ġebla Maltija. L-artal l-ieħor hu dedikat lill-Madonna tar-Rużarju bi kwadru antik li juri lill-Verġni Marija bil-Bambin jagħtu r-Rużarju Mqaddes lil San Duminku u Santa Katerina.

Dun Franġisk Penza, li semmejna aktar ’il fuq, ħalla lil din il-Knisja Kurċifiss ta’ l-avorju meqjum f’niċċa ta’ l-injam li fuqha tidher l-arma tal-Familja Penza.

Dari f’din il-Knisja kien hemm bosta kwadri żgħar tal-pittura magħmula b’wegħda lill-Madonna. Minn dawn fadal biss żewġ kwadri ‘ex-voto’ li huma xhieda tad-devozzjoni antika li missirijietna, partikolarment in-nies tal-baħar fil-port tal-Marsa, kellhom lejn Santa Marija tar-Rokna.

F’nofs il-Knisja jinsab midfun wieħed mill-akbar benefatturi tagħha, Lorenzo Bugeja, li miet fid-19 ta' Marzu 1800.

Aktar ’il quddiem hu mistenni li jinbeda r-restawr strutturali ta’ din il-Knisja ferm għal qalb it-Tarxiniżi li jqimu lil Marija bħala l-Omm tagħhom.

Santa Marija u San Bert

Dan ix-xahar Ħal Tarxien jiċċelebra żewġ festi fi tnejn mill-knejjes żgħar tiegħu: il-Festa tat-Tlugħ fis-Sema ta’ Marija fil-Knisja ta’ Santa Marija tar-Rokna u l-Festa ta’ San Bartilmew Appostlu fil-Knisja dedikata lilu u lill-Madonna tal-Bon Kunsill.

Dawn il-festi jiġu ċelebrati fil-15 u fl-24 ta’ Awwissu rispettivament.

Aktar dettalji ’l quddiem.

Ir-Restawr tal-Calì

Wara li aktar kmieni din is-sena, eżattament ftit jiem qabel il-Festa Titulari ta’ Marija Annunzjata, tlesta r-restawr fuq l-affresk tal-lemin fil-Kor tal-Knisja Parrokkjali, issa jmiss li jinbeda x-xogħol fuq l-affresk tan-naħa l-oħra, it-tnejn xogħol il-pittur Giuseppe Calì.

S’issa ntramat l-ewwel parti ta’ l-iscafolding li fuqu se jkunu jistgħu jitilgħu r-restawraturi tal-koperattiva tar-restawr Recoop li kienu fdati wkoll bir-restawr ta’ l-affresk l-ieħor. L-ewwel affresk li kien restawrat juri l-Adorazzjoni tal-Maġi, waqt li issa jmiss ir-restawr tal-Ħarba lejn l-Eġittu, it-tnejn saru fl-1895.

Ir-restawr seta’ jkun possibli grazzi għall-ġenerożità tal-Familja Bonavia li qed tagħmel tajjeb finanzjarment biex ikun jista’ jitwettaq dan ix-xogħol.

Festa oħra lill-Madonna

Grazzi kbira lill-Madonna hekk kif għaddiet ċelebrazzjoni oħra ad unur tagħha wara li l-bieraħ il-Kongregazzjoni tal-Madonna tad-Duttrina għamlet il-Festa tal-Madonna taħt it-tiltu tal-Litanija ‘Tron ta’ l-Għerf’, xahrejn wara li l-poplu kollu ta’ Ħal Tarxien iċċelebra bil-kbir il-Festa Titulari ta’ Marija Annunzjata.

Issa jmiss li fl-ewwel Ħadd ta’ Settembru l-Parroċċa tiċċelebra l-Festa tal-Madonna taċ-Ċintura u aktar tard fl-ewwel Ħadd ta’ Ottubru l-komunità Parrokkjali tiċċelebra l-Festa tal-Madonna tar-Rużarju Mqaddes. Imbagħad fit-8 ta’ Diċembru niċċelebraw il-Konċepiment Immakulat ta’ Marija, ftit jiem qabel il-Milied Imqaddes tal-Mulej.

Marija Annunzjata, Padruna tal-Parroċċa u tar-raħal kollu, tberikna lkoll.

Il-Knisja tiċċelebra l-‘Ġmiel tal-Karmelu’

Illum is-16 ta’ Lulju l-Knisja Kattolika tiċċelebra l-festa tal-Beata Verġni Marija, Omm u Ġmiel tal-Karmelu.

Din il-festa tattira devozzjoni kbira fil-gżejjer Maltin, frott il-ħidma tal-Patrijiet Karmelitani, partikolarment fil-lokalitajiet fejn għandhom il-kunventi tagħhom. Il-qofol tal-festa jintlaħaq illum fil-Belt Valletta, fis-Santwarju Bażilika Karmelitana.

Fid-9.15 am: Konċelebrazzjoni Solenni tal-Festa mmexxija mill-W.R. Patri Alexander Vella, O.Carm., Prijol Provinċjali, bis-sehem tar-Reliġjużi Karmelitani. Fis-6.45 pm: Purċissjoni forma ta’ pellegrinaġġ mat-toroq tal-Belt bil-vara devota tal-Madonna tal-Karmnu.

Għalina t-Tarxiniżi l-Ordni Karmelitan għandu jsib post speċjali f’qalbna peress li jiċċelebra il-festa tat-Tħabbira tal-Mulej fil-25 ta’ Marzu, bħala waħda miċ-ċelebrazzjonijiet ewlenin tiegħu. Tant hu hekk li l-ewwel Knejjes Karmelitani f’Malta huma dedikati lit-Tħabbira tal-Mulej fosthom dik fl-Imdina u l-oħra tal-Lunzjata fir-Rabat.

Rassa kbira fil-Festa Titulari

Qed nippublikaw aktar ritratti, din id-darba juru r-rassa kbira tan-nies li jattendu bi ħġarhom għall-ħruġ u d-dħul tal-purċissjoni tal-Lunzjata nhar il-festa tagħha f’Mejju.

Il-Madonna ‘Tron ta’ l-Għerf’

Fil-Parroċċa tagħna jinsabu mwaqqfin ħames fratellanzi.

L-eqdem fosthom, dik tas-Ssmu. Sagrament u dik tal-Madonna tar-Rużarju Mqaddes, twaqqfu fl-1597 fil-Knisja l-antika tal-Lunzjata li kienet tinsab fl-inħawi ‘tal-barrani’, fejn illum hemm wieqfa niċċa kbira tal-ġebel dedikata lil-Lunzjata.

Wara dawn twaqqfu l-fratellanzi tal-Madonna taċ-Ċintura u tal-Kunċizzjoni u aktar tard il-Kongregazzjoni tal-Madonna tad-Duttrina.

B’hekk f’Ħal Tarxien, apparti l-Festa Titulari ta’ Marija Annunzjata bħala Padruna tal-Parroċċa, jiġu ċelebrati erba’ festi oħrajn: Corpus Domini ċelebrat Ħadd fuq it-Trinità Qaddisa; il-Madonna tar-Rużarju Mqaddes fl-ewwel Ħadd ta’ Ottubru; il-Madonna taċ-Ċintura fl-ewwel Ħadd ta’ Settembru, il-Kunċizzjoni fit-8 ta’ Diċembru u l-Madonna tad-Duttrina ċelebrata Ħadd fuq is-16 ta’ Lulju.

Minn dawn baqgħu jiġu ċelebrati s-Solennità tal-Ġisem u d-Demm tal-Mulej u l-Madonna tar-Rużarju Mqaddes bħala festi tal-komunità parrokkjali, bis-sehem tal-fratellanzi kollha tal-Parroċċa, u l-festa tal-Madonna tad-Duttrina, meqjuma fil-Litanija tal-Madonna bħala ‘Tron ta’ l-Għerf’, bis-sehem tal-Kongregazzjoni tad-Duttrina.

Din is-sena l-Festa tal-Madonna tad-Duttrina se tkun ċelebrata nhar il-Ħadd 20 ta’ Lulju. Il-festi jiftħu bl-ewwel jum tat-Tridu nhar il-Ħamis, 17 ta’ Lulju, b’quddiesa bil-priedka minn Patri Alex Cauchi OSA. Il-Ġimgħa u s-Sibt ikomplu bit-tieni u t-tielet jiem tat-Tridu.

Imbagħad il-Ħadd 20 ta’ Lulju quddiesa fid-9.00am u purċissjoni fis-7.00pm.

Is-Sibtijiet tar-Rużarju

Illum, is-Sibt 12 ta’ Lulju 2008, tkompli d-devozzjoni tas-Sibtijiet tar-Rużarju.

Din id-devozzjoni, marbuta mal-Fratellanza tal-Madonna tar-Rużarju u l-qima li l-Madonna taħt dan it-titlu tgawdi fost il-poplu Tarxiniż, tikkonsisti fi 15-il Sibt bi tħejjija għall-festa fl-ewwel Ħadd ta’ Ottubru.

Is-Sibtijiet tar-Rużarju bdew il-ġimgħa l-oħra b’Ċelebrazzjoni Ewkaristika bil-priedka.

L-ewwel Sibt fakkar l-Ewwel Misteru tar-Rużarju: it-Tħabbira tal-Mulej lill-Verġni Mbierka Marija li kellha ssir Omm Alla. Illum, it-tieni Sibt tar-Rużarju, hu marbut mat-Tieni Misteru: iż-Żjara ta’ Marija lil Santa Eliżabbetta.

Aktar ritratti tal-Festa Titulari

F’dawn l-aħħar jiem komplew jidħlulna aktar ritratti tal-Festa Titulari ta’ Marija Annunzjata. Ħajr mill-qalb lil Clyde Dalli ta’ dawn ir-ritratti.

L-ewwel ritratt juri dettal sabiħ ta’ wiċċ il-Madonna, mnaqqxa b’ħila kbira minn Xandru Farrugia (1829).

“Inti l-isbaħ fost in-nisa,
ġmielek jimla’ kullimkien,
dan ir-raħal bdiltu f’ġenna,

l-isbaħ opra tal-ħolqien.”

Ritratti oħrajn juru l-logħob tan-nar maħdum b’sengħa mill-membri u d-dilettanti fi ħdan l-Għaqda tan-Nar San Gabriel, kif ukoll l-armar ta’ Triq Paola u l-Marċ ta’ l-Anġlu fi tmiem in-Novena.

Ma’ dawn qed nippubblikaw ukoll ritratt sabiħ li juri l-aħħar mumenti tal-purċissjoni bl-Istatwa Titulari tal-Lunzjata hekk kif waslet f’Misraħ is-Suq, ftit tal-ħin qabel id-dħul trijonfali tagħha fil-Knisja Parrokkjali.

Ħajr mill-qalb lil Sammy Busutill ms-Sezzjoni Żgħażagħ ta’ l-Għaqda Muzikali Marija Annunzjata.

Sejba prejstorika ġdida f’Ħal Tarxien

Il-ġurnal The Times (8 ta’ Lulju 2008) irrapporta dan li ġej dwar dak li qed jitqies bħala l-aktar sejba prejstorika mportanti f’dawn l-aħħar 18-il sena, fl-inħawi tat-Tempji Neolitiċi f’Ħal Tarxien:

Important archaeological find in Tarxien
Pottery shards date back to Temple Period
Waylon Johnston

An archaeological discovery described as the most important in 18 years has been made at the site of the Tarxien temples.

Malte Environment Planning Authority (MEPA) officials discovered megaliths and other remains, which are most probably prehistoric, during development works within the buffer zone of the Neolithic Temples.

The site was described by archaeologist Kevin Borda as the most important one since a burial ground was unearthed at the Brockdorff Circle in Xagħra in 1990. It lies within a plot of land measuring 25 by eight metres towards the back of the plot.

The megaliths and boulders were found together with pottery shards made up of rims, handles and bases in an area measuring roughly four by four metres. The shards have scratched and incised motifs which date them to the Temple Period.

The discovery was made during a routine inspection by the Heritage Planning Unit within the Forward Planning Division at MEPA, following the issue of a permit for the re-development of an existing building within the buffer zone. The zone was scheduled by MEPA in 1998.

During the inspection it was noted that demolition and site clearance works had uncovered a number of features which date back to 4,100-2,500 B.C.

“The importance of the site is enhanced by the possibility that there are other structures beneath the intensive building works that were carried out in the 1980s in the Tarxien area,” Mr Borda said.

In line with the Cultural Heritage Act, 2002, MEPA has submitted the information to the Superintendence of Cultural Heritage which has confirmed the interpretation of the features as identified by the Heritage Planning Unit. The agencies are now collaborating to investigate the features and ensure their preservation.

http://www.timesofmalta.com/articles/view/20080708/local/important-archaeological-find-in-tarxien

Il-Festa Titulari mil-Lenti Tagħkom... Aktar Ritratti

Komplew jidħlu aktar ritratti tal-Festa Titulari ta’ Marija Annunzjata. Din id-darba mingħand Anthony Cini. Grazzi mill-qalb.

L-ewwel ritratti juri l-Istatwa Titulari ta’ Marija Annunzjata, xogħol Mastru Xandru Farrugia (1829) armata fin-navata tal-Knisja.

Ta’ min jinnota li dawn ir-ritratti ttieħdu fil-Festa tas-sena l-oħra tant li fihom jidher id-damask qabel ma sar xogħol estensiv ta’ tiswija u restawr fuqu, liema xogħol sar b’mod volontarju minn għadd ta’ ħajjata Tarxiniżi taħt il-kordinazzjoni ta’ Paul Mula.





L-aħħar ritratt juri l-istatwa ta’ l-Anġlu tal-Marċ, xogħol ta’ l-istatwarju u mgħallem tal-kartapesta Karlu Darmanin.

Dan l-Anġlu jirrappreżenta l-qerda ta’ l-ereżija ta’ Nestorju li ċaħad li l-Madonna hija Omm Alla.

Lulju... ix-xahar tal-Madonna tal-Karmnu

Tlett xhur matul is-sena għandhom dedika partikolari Marjana.

Mejju, ix-xahar tal-fjuri u l-aktar xahar sabiħ tar-Rebbiegħa, hu meqjus bħala x-xahar tal-Madonna u matulu niċċelebraw il-Festa Titulari ta’ Marija Annunzjata. Imbagħad Ottubru hu meqjus bħala x-xahar tar-Rużarju ta’ Marija waqt li Lulju għandu rabta speċjali mal-Madonna tal-Karmnu.

Fil-Knisja Parrokkjali tagħna, bħal bosta knejjes oħrajn, insibu mwaqqaf artal dedikat lill-Madonna tal-Karmnu meqjuma bħala Refuġju ta’ l-Erwieħ mill-Purgatorju. Dan l-artal twaqqaf wara li fl-1723 ingħalqu l-bibien tal-kappelluni li kellha l-Knisja oriġinalment.

Fuq l-artal tqiegħed kwadru sabiħ li juri lill-Madonna tal-Karmnu bejn San Filippu Neri u Sant’ Antnin ta’ Padova u bl-Erwieħ tal-Purgatorju fin-naħa t’isfel, xogħol il-pittur Franċiż Enrico Reynaud. Aktar tard imbagħad żdied sotto-kwadru li juri lill-Madonna tad-Dawl u Sant’Inazju ta’ Loyola.

Matul is-Seklu 18 dan l-artal kien imżejjen bi skultura barokka mill-isbaħ b’għadd ta’ qaddisin skolpiti fil-ġebel fosthom il-figuri ta’ San Xmun Stokk u San Elija, il-padruni ta’ l-Ordni Karmelitan.

Fit-tieni nofs tas-Seklu 19 il-Knisja Parrokkjali ta’ Ħal Tarxien laħqitha l-id qerrieda tal-moviment tan-Nazzareni li, bi skuża ta’ dehra ġdida u biex tissaħħaħ l-istruttura tal-bini, wasslet biex qerdet l-iskultura barokka kollha li kienet iżżejjen il-Knisja, fosthom dik madwar l-artal tal-Karmnu.

Aktar tard dan il-kappellun beda jissejjaħ bħala ‘tad-Duttrina’ wara li tqiegħed sotto-kwadru ġdid taħt il-kwadru prinċipali fuq l-artal li juri lill-Madonna ‘Tron ta’ l-Għerf’ xogħol Pietro Gagliardi.

Ir-rabta bejn San Pawl u Ħal Tarxien

L-għeruq Pawlini f’Ħal Tarxien immoru lura fiż-żmien.

Jingħad fost l-oħrajn li l-Appostlu Pawlu, matul il-waqfa tiegħu f’Malta, għadda minn Ħal Tarxien fejn ħalla wkoll il-fidi fi Kristu fost l-abitanti ta’ l-inħawi. Il-leġġenda tgħid li dakinhar l-aħbar tal-fidwa minn San Pawl f’Ħal Tarxien saħansitra laqħqet widnejn iż-Żwieten.

F’dan l-istess post aktar tard mal-medda taż-żmien twaqqfet niċċa tal-ġebel bil-figura ta’ l-Appostlu, l-istess niċċa li għad hemm illum fi Triq il-Kbira.

Din l-idea ta’ San Pawl f’Ħal Tarxien żviluppha wkoll il-Kan. Dun Ġwakkin Schembri fil-paniġierku li kien niseġ fil-Festa Titulari ta’ Marija Annunzjata fl-1985. Schembri kien ġab quddiem għajnejh lil San Pawl jippriedka lit-Tarxiniżi u warajh San Luqa jirrakkontalhom mill-Evanġelu tiegħu r-rakkont tat-Tħabbira tal-Mulej.

Il-probabiltà hi li din il-leġġenda wasslet biex aktar tard f’Misraħ is-Suq inbnew żewġ knejjes filjali żgħar dedikata lil San Pawl u lil San Luqa flimkien ma’ oħra dedikata lil San Nikola. Dawn it-tlett knejjes jissemmew fil-Vista Pastorali li Mons Pietru Duzina għamel fl-1575.

Aktar tard, fl-1610, dawn it-tlett knejjes filjali kellhom jinħattu biex minflokom tibda tinbena l-Knisja Parrokkjali preżenti. San Pawl għalhekk spiċċa tilef il-Knisja li kellu iżda x-xbieha tiegħu flimkien ma’ dik ta’ San Luqa kienu nkorporati fl-ewwel kwadru titulari tal-Lunzjata li sar għall-ħabta ta’ l-1627.

Il-kwadru titulari nbidel maż-żmien u San Pawl tilef postu mill-kwadru titulari, iżda xorta waħda baqa’ tifkira tiegħu f’bassoriljev skulturat fil-ġebel li jinsab moħbi wara l-kwadru tas-Sagra Familja fuq l-artal ta’ San Ġużepp.

Fuq il-Passi ta’ Missierna San Pawl

Għal din l-okkazzjoni specjali l-Isqfijiet Maltin ħarġu Ittra Pastorali bit-tema ‘Fuq il-Passi ta’ Missierna San Pawl’.

L-Ittra sħiħa tista’ tinqara fis-sit ta’ l-Arċidjoċesi Maltija http://www.maltadiocese.org/page.aspx?p=1356&l=2&id=319.

(Ir-ritratt juri statwa tad-deheb ta’ San Pawl, li flimkien ma’ statwa oħra ta’ San Pietru, ntramat bejn il-gandlieri fuq l-Artal Bażilikali taħt it-Tribuna Papali fil-Bażilika Vatikana ta’ San Pietru, nhar il-festa tal-Appostli Pietru u Pawlu 2008.)

Tiftaħ is-Sena Pawlina

Proprju llum, Festa tal-Martirju ta’ l-Appostli Pietru u Pawlu, fetħet is-Sena Pawlina fl-okkazzjoni tat-Tieni Millenju mit-twelid ta’ l-Appostlu tal-Ġnus.

Il-ftuħ tas-Sena Pawlina sar mill-Papa Bendeittu XVI fil-Bażilika ta’ San Paolo fuori le mura f’Ruma, waqt li f’Malta sar fil-Katidral ta’ l-Imdina u fil-Kolleġjata Pawlina tar-Rabat.

Is-Sena Pawlina qed tkun iċċelebrata fil-Knisja Kattolika kollha b’mod universali fid-dinja kollha.

F’Malta dawn il-festi qed jieħdu xejra speċjali peress li kien San Pawl li ġab fostna t-tagħlim ta’ Kristu u għammed lil pajjiżna f’wieħed nisrani.

Il-Festa Titulari mil-Lenti Tagħkom... l-Ewwel Ritratti

L-ewwel ritratti diġa bdew deħlin, ftit minuti wara l-appell tagħna.

Ħajr lil Adrian Theuma, Kaxxier ta’ l-Għaqda tan-Nar San Gabriel, li għaddielna dawn ir-ritratti li juru l-purċissjoni bl-Istatwa Titulari ta’ Marija Annunzjata, waqt li għaddejja minn quddiem il-Każin ta’ l-Għaqda Mużikali Marija Annunzjata fi Triq Paola, u l-aħħar mumenti tal-‘Marċ ta’ l-Anġlu’ f’Misraħ is-Suq quddiem il-Knisja, nhar il-Ġimgħa 23 ta’ Mejju.

Il-Festa Titulari mill-Lenti Tagħkom

Kull min għandu xi ritratti tal-Festa Titulari ta’ Marija Annunzjata 2008 u jixtieq jaqsamhom magħna jista’ jagħmel dan billi jibgħathom f’dan l-indirizz elettroniku: lunzjatatarxien@gmail.com.

Grazzi minn issa lil dawk li se jibgħatu xi ritratti.

Ħarsa lura u oħra ’l quddiem

Il-Festa Titulari ta’ Marija Annunzjata ġiet u marret u diġa għadda xahar. Għall-grazzja t’Alla u t’Ommna Marija kollox għadda b’wiċċ il-ġid u nistgħu ngħidu li għal darb’oħra l-Festa f’Ħal Tarxien fetħet l-istaġun tal-festi bil-kbir.

Sa minn issa nbdew il-preparamenti għall-Festa Titulari 2009 li se tkun iċċelebrata l-Ħadd 24 ta’ Mejju.

Għalhekk minn issa awguri lil kull min hu nvolut fil-ħidma b’risq il-festa.

Intant irridu nibdew ukoll it-tħejjijiet għall-Festi Ċentinarji li se nkunu qed niċċelebraw sentejn oħra fl-2010: 400 sena mill-bidu tal-bini tal-Knisja Parrokkjali (rikors 5 ta’ Mejju 1610) u 100 sena mindu l-Parroċċa tagħna saret Matriċi (bit-twaqqif tal-Parroċċa tal-Qalb Imqaddsa ta’ Ġesù f’Raħal Ġdid f’Lulju 1910).

Dawn se jkunu festi speċjali għall-Parroċċa tagħna u għall-komunità parrokkjali kollha u għalhekk irridu nibdew naħsbu għalihom minn issa biex jerġa’ jkollna programm vast ta’ ċelebrazzjonijiet kif sar fl-1992 meta għalaqna 400 sena Parroċċa.

Ir-ritratti t’hawn taħt bla dubju se jfakkruna fil-mumenti sbieħ tal-ħruġ tal-purċissjoni tal-Lunzjata fil-25 ta’ Mejju li għadda, u żgur li se jħeġġuna biex naħdmu aktar bil-qalb għas-sena d-dieħla u dik ta’ warajha.